ريحة البلاد جولة حنين في لمدينة والربطين

الروايح التي كانت تفوح مالمدينة ، كانت تهز عروش القلب، شنية روايح؟ كان بنادم كي يتعدى كل دار يشم فيها ريحة تفولغ المخ. دار تشم فيها ريحة معجون السفرجل بالقرفة وعود القرنفل، ودار ريحة الملاوي بزيت الزيتونة، ودار ريحة الكسكسي بالعصبان، ودار قاتو الدرع بالعطرشية، ودار ريحة الفريكاسي، ودار ريحة المبطن بالخرشف ودار حلالم بالقديد، ودار ريحة المعقودة بالرنقة، وإلا ملوخية، وإلا مدفونة، بناضج، مدموجة، وساعة على ساعة ريحة بخور، وشق وداد ، وإلا ريحة زليزية حرقوس. والخبز إللي كانو يطيبوه في الديار أنواع وأشكال عد وأغلط : خبز قمح، وخبز شعير، وخبز ذرّة، وخُبز مبسس، وخُبز طابونة، وكسرة، وخبز غناي، وخُبز فطير، وخبز أبراج، وخبز و الشطيرة بالعظم، وخُبز مالح بالدّجاج والزوايد وإلا باللحم، إلخ... يا حسرة يا زمان