الأبله السعيد

أنا أبله سعيد، ما يعبرو عليه بالفرانسوية Imbecile heureux، والشي هذا ما يقلقنيش بالكل، بل بالعكس ديما نحاول ونسعى باش نركز، ونغذّي، وانّمي الفكرة والصفة والشهرة هاذي عند الناس، على خاطر الحمق، والغباوة والبلاهة متاعي أنا مقرّرهم ومسطرهم في إطار خطة مدروسة ومستوحاة من تجاربي اليومية باش ننجح في الحياة. على حسب تجربتي في هالدنيا الكلبة، لاحظت اللي أكثر الناس قلوبهم كحل ومغيارين وبغضيّين وحسوديين، وأشكون يبغضو ؟ ما يحسدوش الفقراء، والزواولة والتّرورة، والمزمرين، والخياب، ووجوه اللوح، والشلايك والبهايم، والمسطكين، والمنتفين، والبطالة، واللي ماعندهمش غشاء ليلة، هاذم الكل ما يقلقوهمش بالعكس يتقبلوهم بصدر رحب. أما يحسدو كل إنسان نجح في ميدان مالميادين وإلا عمل دار باهية، وإلا كرهبة مضخمة، وإلا مشروع رابح، يهبطو عليه بالسكاكن يقدّدوه، يردّوه تستيرة، كفتاجي بالعظمة. أما اللي يبدى مزمّر يمنع من بلاهم، وخاصة يعطيهم الإحساس اللي هوما خير منو ومتفوّقين عليه، وأنا في معاملاتي مع هالشلايك نقضي بيهم قضيتي ونضحك على لحيتهم، ونمشيلهم في بالهم اللي هوما يضحكو عليا